Comune di Austis (NU) Sardegna

Ite faghimus

Su progetu poniat unu trabballu de chirca e de ordimìngiu de su giassu web partzidu in 3 fases: chirca in sas fontes iscritas presentes giai, chirca cun sos testimòngios de s'allega/cultura locale, iscritura de sos datos. Amus digitalizadu sos datos gheretzende·ddos in categorias gramaticales e culturales. Amus incuradu presentadas e adòbios cun su pùbblicu pro sas atividades; amus aprontadu documentos pro sa tzitadinàntzia in contu de chistiones de su sardu a die de oe; amus cuncordadu gràficas sinnalèticas de amustrare in sas atividades/ufìtzios/butegas; amus ghiadu una chirca in pitzu de su limbàgiu de su logu, pro dd'acarare a sa limba comuna, chi est partzida intre ischedas culturales, in ue bi sunt iscritos in austesu cumentados e ischedas linguìsticas, in ue in pitzu de una base de grammàtica in LSC amus postu sa versione austesa; amus trabballadu a cuncordu cun Entes, Sòtzios de cultura e mascamente sa Biblioteca comunale; amus donadu consulèntzia a sa gente pro nde ischire de prus in contu de polìtica linguìstica.

Su cursu pro sos dipendentes, abertu a sa tzitadinàntzia, dd'amus ordidu paris cun sa Provìntzia de Nùgoro tenende un'agiudu mannu e sa collaboratzione de sa diretora de s'Ufìtziu, sa Dot.ssa Mariantonietta Piga. Tenende contu ca a die de oe su bonu de sos sardos non giughet peruna alfabetisatzione in sardu, mescamente in contu de iscritura, amus mòidu dae sas informatziones in pitzu de s'istòria de sa limba e de sas leges chi dd'amparant tochende a s'iscritura (personale e standard/amministrativa) e bia a s'impreu amministrativu de sas limbas de minoria.