Comune di Austis (NU) Sardegna

Comunicatzione

Su sardu, limba istòrica de su pòpulu sardu, est una de sas richesas culturales sardas prus mannas. Ca totu inserrat e totu narat, e in s'espressione sarda sa gente sentit sas raighinas suas. Est una limba reconnòschida dae sa lege istatale chi normat sas limbas de minoria sa 15.12.1999 n.482 de s'Istadu. Oe in die su sardu est limba trasmìtida a livellu intergeneratzionale petzi in pagu àreas de sa zona tzentru orientale de sa Sardigna. In su prus de sas zonas est una limba chi sos pipios e giòvanos no imparant prus in manera cumprida, cun una cumpetèntzia prus bassa. A livellu generale est limba allegada dialetalmente e informalmente ebbia, istrecada dae sa limba ufitziale (s'italianu) in dònnia tretu de sa vida culturale, economica, iscolàstica, iscientìfica. B'est una realtade de diglossia chi est colende a dilalia, a tesu dae àteras realtades europeas in ue b'est su bi- o trilinguismu, comente Catalùnia o Sud-Tirol. Sa punna est de bìnchere su disafiu de sa modernidade e leare su sardu a isòrvere sa chistione linguìstica, afirmende·ddu comente limba de comunicatzione e de coesione sotziale. Pro custa resone serbint sos càmbios culturales e su de àere una limba capatza de parare fronte in antis de sos bisòngios comunicativos modernos. S'annoamentu de sighida est pretzisu, gasi etotu comente un'impreu in sedes giornalìsticas, iscolàsticas e iscientìficas. Sas limbas, narant is linguistas, giughent non feti informatziones, ma mescamente balores. Custos nos perdimus chi sighimus a pensare a su sardu petzi comente limba “pedrale”, diferente dae bidda a bidda (ca in prus totus ischint ca est diferente dae persone a persone!), galana in s'allegare ebbia. Oe in die sas limbas bivent petzi si sunt simples e làdinas e bonas pro sa tzivilidade tecnològica. Si in prus sunt presentes in iscola tando ddas bidimus comente limbas ufitziales, ca donniunu de nois bolet inghitadu, e pro imparare sistemas linguìsticos cumpridos pro un'impreu ufitziale e iscientìficu bolimus annos e annos de iscola, in contu de custu balet sa letzione de s'italianu e de calesisiat àtera limba. Su sardu est galu sa limba de sa sotziedade e de su mundu simbòlicu nostru, de cando tratamus, de cando trabballamus, de cando imparamus e inditamus sos balores de sa cultura nostra. Sa limba s'est pesada in sa buca e in su coro de sa gente in chentas e chentas de genias dae ora manna, e galu depet de bìvere ca semus nois etotu.